Die week op Landbouweekliks | Holistiese beginsels geld op Zoetvlei

Jennifer Speedy boer die afgelope 27 jaar op Zoetvlei naby Vryburg in Noordwes en volg in die voetspore van haar pa, Sandy Speedy, een van die pioniers van holistiese beweidingsmetodes in SA. Die Speedys boer sowat 50 km wes van Vryburg met 2 600 Nguni’s. Sandy het die weidingspesialis Allan Savory ontmoet en besef die holistiese beginsel sal op sy plaas werk. Die idee is om die weidingspatrone wat in Afrika geheers het voor die vrye beweging van diere ingeperk is, na te doen. Sedert Jennifer begin boer het, pas sy en haar pa drukbeweiding in alle erns toe.

Op Landbouweekliks vanmiddag | Grieta boer vooruit met indrukwekkende lampersentasie

Vanmiddag om 17:30 lê ons besoek by Dr. Elsie af. En as jy nie hierdie afspraak kan maak nie nie, kan jy die heruitsending Donderdae om 18:30 kyk.

*Ook beskikbaar op Catch Up en in die DStv-app.

Dr. Elsie Campher het ’n doktorsgraad in organisatoriese ontwikkeling en ’n honneursgraad in plantbiochemie en het eerste laat in haar lewe teruggekom plaas toe naby Harrismith. Daar het sy nuwe lewe geblaas in van die land se oudste Brangus-teelmateriaal met die Helpmekaar-stoetery. Haar pa, Jannie, is een van die stigters van die Brangus-ras in Suid-Afrika. Op hierdie plaas, sê sy, is hulle ’n span. Elsie bestempel die Brangus-bees as die “agtste wonder van die wêreld.” Al haar diere word ná veldtoetse geskandeer, want “meet, meet, meet is my leuse.”

 

Die week op Landbouweekliks | Voerkraal is hul beste bate

Estelle van Reenen is die bestuurshoof van Sparta Beef (een van die grootste voerkrale in Suid-Afrika) naby Marquard in die Vrystaat. Naspeurbaarheid speel ’n belangrike rol in die geïntegreerde besigheid. Sparta is so eg Suid-Afrikaans soos dit kom en dié maatskappy in familiebesit word nou deur die tweede geslag bestuur. Estelle se suster, Lynette, is die hoof van besigheidsontwikkeling en haar broer, Lou, is voorsitter van die direksie. Oorlede Dirk van Reenen het die boerdery in 1967 met sowat 30 stuks vee op die plaas Sparta begin.

 

Nuwe tydgleuf vir Landbouweekliks in 2022

Vanaand op Landbouweekliks | Kersies laat harte warm klop

Gwynet Higgo is ’n sakevrou wat die bekende Constantia-kersiepadstal naby Clocolan in die Oos-Vrystaat bedryf. Haar man, Gerrit, sorg vir die boerdery, en kersies laat sy hart warm klop. Ander vertakkings is beeste en gewasse. Die eerste kersies is in 1953 deur Gerrit se pa, Kempen, aangeplant. Vandag is die Higgo-gesin van die bekendste kersieprodusente in die land. Die boerdery bestaan uit sowat 40 ha kersies onder nette teen die goed gedreineerde steil hellings nagenoeg 1 680 m bo seevlak. Nagenoeg 30% van die plaas se produkte word uitgevoer.

Vanaand op Landbouweekliks | Dié skaapboer is propvol planne

Matthew Morgan produseer van Suid-Afrika se beste wol naby Tarkastad in die Oos-Kaap. Een van sy wenplanne is ’n doelgerigte jagter met ’n span jaghonde wat probleemdiere laat les opsê. Dié jong skaapboer is ’n man wat glo dat sy geslag standaarde moet verbeter én ’n plaas in ’n beter toestand aan die volgende geslag moet oorgee as waarin hy dit ontvang het. Nie net is hy bevoorreg om grond met ’n hoë produksiepotensiaal te kan hê nie, hy is geseënd met geleenthede vir toekomstige ontwikkeling. Hy boer met 8 000 Merino’s en 750 Herefords op 3 600 ha.

Die week op Landbouweekliks: ‘Slim’ verbruik lei tot sukses

Digby Somerset-Oos in die Oos-Kaap word onder meer nuwe sitrusblokke gevestig deur Louis Wilken en sy jongste seun, Jaco. Dié besproeiingsboere ken van slim watergebruik uit die Oranje-Visrivierskema en puik grondbewaringspraktyke. Hulle verbou sitrus, kiwivrugte, koring, mielies, pampoene en aartappels, en het ’n Bonsmara-kudde. Louis se boerderyloopbaan het klein begin nadat hy naby Douglas as polisieman op ’n kleinhoewe begin het om groentesaad vir Starke Ayres te produseer. Hy word bestempel as ’n besproeiingspionier en saam met sy gesin is hulle ’n wenspan.

Die week op Landbouweekliks | ‘Doyenne’ teel top-Dormers

Op 77 stuit niks Erika Hanekom nie. Sy boer al amper 60 jaar lank. Sy is ’n voormalige SA Stamboek Kleinvee-stoetteler van die Jaar en boer saam met haar seun, Alwyn, naby Malmesbury op die plaas Rhenosterbosrug met Dormers, Holsteins, gesaaides en wingerd. Hanekom word deur baie as die “doyenne van die Dormers” genoem. Die melkkoeie het die afgelope paar jaar meer as verdubbel. Gewasse word verbou vir voerdoeleindes, waaronder weiding, kuilvoer en hooi. Erika vertrou op toegewyde teling, streng seleksie en die noukeurige byhou van inligting.

Die week op Landbouweekliks | Onbaatsugtigheid hul leuse

Die broers Petrus, PD en Jannie Bosman is die bestuurders van Bosman Adama, Wellington, waarin 260 werkers in 2008 aandele gekry het. Bosman Adama is ’n getransformeerde landbouonderneming, maar in wese ook ’n familieboerdery. Dit bestaan uit ’n wingerdkwekery en plantverbeteringsaanleg, terwyl wyn onder die Bosman-handelsmerke geproduseer word. Bosman Adama spreek van onbaatsugtigheid en mededeelsaamheid. Hul etos, geloof, hoop en liefde, vind inslag in alles – van die grond, die werkers en die wyn, tot die manier waarop die plaas bestuur word.

Die week op Landbouweekliks | Dié boer koester die grond

Aan die hange van Klein-Drakenstein lê Avondale, waar Jonathan Grieve biodinamiese wyn produseer. Gesonde uitvoer het covid-19 se impak versag, maar planne is beraam om probleme te oorkom. Jonathan het die proses begin om die grond tot ’n volhoubare en gebalanseerde ekostelsel te omskep om te verseker Avondale kan toekomstige geslagte onderhou. Avondale maak vandag buitengewone wyn wat die goedkeuring van Moeder Natuur wegdra. Meer as 80% van wynverkope vind hoofsaaklik in Europa plaas.