Dié boer en sakeman kyk geen geleentheid mis

Alfonso Visser van Hartswater in die Noord-Kaap is ’n boer en sakeman wat geen geleentheid miskyk nie. Hy is die grootste verwerker van pekanneute en grondbone in Suid-Afrika en en was in 2008 Landbouskrywers SA se Boer van die Jaar. Alfonso is ook die uitvoerende hoof van die Suid-Afrikaanse filiaal van Golden Peanut & Tree Nut Company. Hierdie Amerikaanse maatskappy het onder meer in 2017 ’n hipermoderne, multimiljoenrand-verwerkings¬aanleg vir grondbone op Hartswater geopen.

Suksesvolle jongboer fokus op vernuwing

Herman Janse van Rensburg is Vrystaat Landbou se Jongboer van die Jaar vir 2019. Hy boer met mielies, sonneblom en vee op die plaas Port Arlington, waar hy grootgeword het. Hy het Arlington-staalwerke begin om werktuie vir die boerdery te vervaardig, maar deesdae word dit landwyd versprei. Herman is betrokke by die Agri Arlington-boerevereniging, en hy glo in vernuwing. “Daar moet deurgaans nuwe ouens, nuwe idees en nuwe denke wees sodat ons Suid-Afrika se voedselsekerheid kan oppas.”

Goeie gene lei tot goeie vleis

Christopher Sparks, ’n argitek, is ’n bekroonde beesteler. Hy benut genomika vir snelle vordering en winsgewende produksie, en gevolglik is Mount Olive Genetics naby Harrismith in die Vrystaat toegespits op goeie gene en die beste vleisgehalte. Die Brangusbeeste kraai hier koning, met Nguni’s kort op hul hakke. Sparks, vorige voorsitter van die Lewendehawe-registrerende Federasie, is verlede jaar op die Aldam-veeskool aangewys as die Suider-Afrikaanse Stoetteler van die Jaar.

Dié familie vrugteboere streef na gehalte

In die nuwe episode van Landbouweekliks kuier ons by Ceres in die Koue-Bokkeveld op die De Keur-landgoed, wat appels, pere, bloubessies en uie vir die uitvoermark produseer. Soos baie vrugteboere in die Wes-Kaap moes die Du Toits ook planne beraam om die droogte te oorleef. Die familie behartig hul eie bemarking en uitvoer, en hul gesofistikeerde verpakkings- en opbergingsaanlegte is reg deur die jaar in bedryf. Hulle verskaf permanente werk aan ongeveer 150 mense, en nog 200 doen kontrakwerk. Gehalte is vir hulle die wagwoord.

Ryk geskiedenis bring sukses na De Grendel

Sir De Villiers Graaff, die vierde geslag met dié titel, is die De Grendel-landgoed se besturende direkteur. Hy het, nes sy pa, landbou op Stellenbosch studeer. De Grendel, wat naby Kaapstad teen die Tygerberg geleë is, is al geslagte lank in die Graaff-familie se besit. Hoewel De Grendel bekend is om bekroonde gehalte-wyne, is skape, ’n melkbeesstoetery en bloubessies ook deel van die boerdery. Bemagtiging is belangrik vir De Villiers en gevolglik is die familie ook by maatskaplike projekte betrokke.

Landbouweekliks kuier op Nampo

Japie Grobler van die plaas Karookom op die grens tussen Bothaville en Viljoenskroon in die Vrystaat is een van Suid-Afrika se voorste boere. Hy is voorsitter van Agri Securitas en voormalige voorsitter van Graan SA, Senwes en Agri Suid-Afrika. Japie het twee jaar gelede ’n ernstige motorongeluk oorleef, waarna sy saai-en-veeboerdery groot veranderinge ondergaan het. Sy liefde vir die landbou en nugter uitkyk op die lewe is egter nog dieselfde. Hy sê boerdery is ’n deurlopende leerproses.

 

‘Varksnoet is ’n puik werktuig’

Angus McIntosh is ’n biodinamiese en bewaringsboer op die Spier-wynlandgoed naby Stellenbosch in die Wes-Kaap. Sy groot liefde is om voedingstofdigtheid vas te lê in al sy vertakkings – onder meer vrylopende varke, lêhenne en beeste. Die produkte wat hieruit voortspruit, waaronder eiers, vleis, gerookte kouevleis en vleisbeenaftreksel, word verpak onder die handelsmerk Farmer Angus. Angus se Limousinkudde was die eerste amptelik geregistreerde veldbeeste in Suid-Afrika.

 

Gesin behaal vir dekades sukses met Merino-stoetery

Stephan Nel en sy seun, Stephan (jr.), boer met skape in die afgeleë bergagtige landskap naby Barkly-Oos in die Oos-Kaap. Hy bedryf ook die bekende Bergplaas-Merinostoetery, wat 81 jaar gelede deur sy oupa Frikkie Nel begin is. Stephan het ’n groot liefde vir Merino’s en spog met verskeie eerbewyse. Hy het al ’n kampioen-Merinoram én -ooi geteel, en bied elke jaar ’n suksesvolle produksieverkoping aan met van die hoogste verkoopsgemiddeldes in die Merinobedryf.

 

Dié Vrystaatse boerdery floreer met familietradisies

Ernst Yzel en sy twee seuns, Tom en Nant, boer op die plaas Wonderkuil naby die dorp Marquard in die Oos-Vrystaat. Hulle boer met verskeie vertakkings (vee, gesaaides en droëlandaartappels), waarvan heelwat op huurgrond bedryf word. Met Ernst se kinders wat die vyfde geslag op die plaas is, sit die Yzels ’n familietradisie voort wat deur Ernst se oupagrootjie begin is. Ernst was voorheen voorsitter van Aartappels SA, en ook ’n stigterslid van die Vrystaatse Jongboerkomitee.

 

Wenboer woeker op Wakkerstroom

BP Greyling en sy seun, Ghini, bedryf ’n gediversifiseerde boerdery op die plaas Langfontein naby Wakkerstroom in Mpumalanga. Hulle boer met graan, vleisbeeste en -skape, en kweek raaigras- en sojaboonsaad. Hulle plant ook proewe, verpak die saad en versprei landbouinsette aan medeboere. Boonop spog hulle met ’n bekroonde fynwolskaapvertakking en hul eie rooi vleisbees, die Langfonteinbees. BP is in 2011 aangewys as Landbouskrywers SA se Nasionale Boer van die Jaar.