Landbouweekliks | Dinsdae 5.30pm op ViaTV | Wenboer verbeter sy plaas deurlopend

Brad O’Neill, Kwanalu se Jongboer vir 2021, boer naby Richmond in KwaZulu-Natal met suikerriet. Hy gebruik groenbemesting om grondgesondheid te bevorder, én vervaardig rum op die plaas. Sy gebruik van nuwe tegnieke en ’n vasberadenheid om konsekwent elke faset van sy boerdery te probeer verbeter, maak van hom ’n formidabele jong boer. Hy is geprys vir sy toewyding tot presisieboerdery, sy gevorderde en volhoubare biodinamiese praktyke, asook vir die manier waarop hy op die plaas waarde tot sy suikerriet toevoeg met die Sugar Baron Craft Distillery wat rum vervaardig.

 

Die week op Landbouweekliks | Boomboer wil aanhou ‘gooi’ in SA

Jon MacKenzie van Malvern Farms by Harding in KwaZulu-Natal is ’n voormalige wenner van NCT se Boomboer van die Jaar-kompetisie. Hy het ‘n puik, gediversifiseerde boerdery (bosbou, avokado’s en beeste). Daar is baie risiko’s verbonde aan ’n lewe in die landboubedryf, maar hulle gaan aanhou “gooi”, sê Jon. Hy het ’n BCom-graad verwerf nadat hy op ’n plaas by Ixopo as die sesde kind van sewe grootgeword het. Hy het as bosboukontrakteur begin werk, en het Malvern in 2007 gekoop. Hy glo vas aan ’n toekoms in Suid-Afrika vir sy kinders én kleinkinders.

Die week op Landbouweekliks | Vernuwe, maar hou die basiese reg

Thys Louw, sesdegeslagboer op die Diemersdal-wynlandgoed by Durbanville, is ’n man vol planne. Vernuwende produkte, soos Sauvignon blanc wat maande ná parstyd van bevrore sap gemaak word, vind hier gestalte. Diemersdal is een van die oudste familielandgoedere in Suid-Afrika. Dit is in 1698 gestig en word sedert 1885 deur dieselfde familie na die volgende geslag oorgedra. Van ’n baie jong ouderdom het Thys se pa, Tienie, hom ingesluit by alles wat met die boerdery verband hou. Tienie het hom die leuse van “hou die basiese reg en dan sal alles vanself gebeur” ingedril.

Die week op Landbouweekliks | Snyblomme is Adene se passie

Adene Nieuwoudt, ’n voormalige mode-aankoper en troufotograaf, het binne ses jaar Adene’s Farm Flowers, ’n florerende boerdery met buitengewone loof- en snyblomme, buite Wolseley opgebou. Daar verbou sy en haar man, Andrew, meer as 200 verskillende kultivars. Dit het begin toe ’n vriendin van Nederland pakkies blomsaad (wat nie geredelik in Suid-Afrika gekry kan word nie) vir Adene gebring het. Die blomme het blitsvinnig uitverkoop. Die inperkingstyd het ’n hupstoot vir hul knol- en saadverkope verskaf en hoewel hulle baie swaar gekry het, floreer die besigheid tans.

 

Op Landbouweekliks die week | Rentmeesterskap belangrik vir dié sesdegeslagboer

Wernich Lemmer (34) is net sowat drie jaar lank in die tuig op die plaas Lemmersville by Hartbeesfontein in Noordwes, maar dié sesdegeslagboer is reeds bekroon vir sy boerderystyl: Hy is Agri Noordwes se Jongboer van die Jaar 2021. Hy is uiters geesdriftig en optimisties oor die toekoms van die landbou. Wernich sê dit voel of al hoe meer jong mense die landbou as ’n beroep oorweeg. Vir hom is dit die belangrikste om as rentmeester en in sy geloof geanker te bly. Die familieboerdery bestaan uit 80% mielieproduksie en 20% beesproduksie.

Kyk die episode Dinsdag om 17:30 op ViaTV.

Op Landbouweekliks vandag | Jong boer glo in dié boustene

By Lone Tree Farms naby Fouriesburg behartig Doug Osler (40) die appelvertakking. Dit is ’n riskante besigheid, maar Doug sien groot potensiaal vir uitbreidings in die provinsie. Harde werk, aandag aan detail en onwrikbare geloof is die boustene vir Doug se boerderysukses. Doug woeker al nagenoeg 17 jaar in die familieboerdery waarvan hy ’n 25%-aandeel besit. Dit is vir hom belangrik om deel te wees van die georganiseerde landbou sodat ’n boer op ’n sterker voet met die regering en internasionale belanghebbendes kan beding.

Die week op Landbouweekliks | ‘Belê wat jy kan in tegnologie’

Die Britse van Balfour in Mpumalanga is familieboere en Dawie is in 2021 aangewys as TLU SA se Jongboer van die Jaar. Hy boer met sojabone, mielies en hoenders op die plaas Modderbult. Ná skool het Dawie homself as ’n vlieënier bekwaam en meer as 9 000 vliegure opgedoen. Toe hy in 2019 na Modderbult terugkeer om sojabone te oes en sy pa, Pieter, sê hy moet aanbly, het Dawie nie op hom laat wag nie. Sy raad aan ander boere is – as die begroting dit toelaat – om alles wat jy moontlik kan bekostig aan tegnologiese verbeterings te bestee.

Die week op Landbouweekliks | Ritme van die natuur belangrik

Zippo Lamprecht bou al bykans die helfte van sy lewe aan die bekroonde Bloodline Boran-kudde, en hy is nou skaars 31 jaar oud. Hy boer op die plaas Mijnhartsrus, suidoos van Dewetsdorp in die Vrystaat. Hy teel van die beste beeste in Suid-Afrika en sy stoetery is al aangewys as die Kudde van die Jaar. Zippo boer by uitstek saam met die natuur en dit werp elke jaar vrugte af. Op vyfjarige ouderdom het sy pa, Adriaan, sy eerste bees vir Zippo gegee en op 14 het hy sy eerste Boran gekoop. Hy handhaaf sterk biologiese sekerheid en sal nie sommer enige dier koop nie.

Die week op Landbouweekliks | Geleenthede wink met Dohnes

Wikus Bekker, Dohne-Merinoman van die Jaar in 2021, is ’n vierdegeslagboer naby Edenburg in die Suid-Vrystaat. Hy en drie ander telers benut skaalvoordele onder die Crux Dohnes-handelsmerk, en hy het ook al embrio’s na Patagonië uitgevoer. Sy oupa het die grondslag gelê vir die uitgebreide familieboerdery. By Crux word die beste van die topdiere geïdentifiseer. Die 25000 stuks vee is op verskeie plase en huurgrond van die familieboerdery. Wikus word bestempel as die verpersoonliking van ’n familieboer met ’n liefde vir sy gesin én vir sy gemeenskap en die omgewing.

Landbouweekliks vier 200 episodes op die kassie!

Hoewel die meeste televisiereekse nie langer as 13 seisoene duur nie, bewys Landbouweekliks volgende week met sy 200ste episode dat dié program immergroen is. Dit beteken 200 van Suid-Afrika se voorste boerderye en diegene aan die spits daarvan is, het reeds in kykers se voorkamers kom kuier. Die aanbieders reis saam met veldspanne die land vol, lê duisende kilometers af, trotseer slaggate, wind, weer en son om dié mense en hul stories oor voedselproduksie die lig te laat sien.
Om enkele hoogtepunte uit te sonder nadat soveel ongelooflike mense besoek is, sou eenvoudig onmoontlik wees. Chris Burgess, Landbouweekblad-redakteur en aanbieder op Landbouweekliks, sê dit is met groot dankbaarheid teenoor die kykers, borge en elke boer wat sy of haar tyd so onbaatsugtig afgestaan het om met Landbouweekliks te gesels, dat die wonderlike mylpaal van ’n 200ste episode gevier kan word.
Kyk die episode Dinsdag om 17:30 op VIA-TV, DStv-kanaal 147.